மின் வாசகம்

அதே சமயம், தமிழுக்கான இடம் என்பது இன்னம் குறையவில்லை. அது மட்டுமா, இளைஞர்கள் மத்தியிலும் தமிழ் நவநாகரிகத் தோற்றத்தோடு நுழைந்திருக்கின்றது. முன்பு எல்லாம் தீ-சட்டைகளில் ஆங்கில வாசகங்கள் தான் இடம்பெற்று வந்தன. ஆனால் சென்னையைச் சேர்ந்த ராகவ் என்ற இளைஞரால் தொடங்கப்பட்ட "அங்கி ஆடையகம்" என்ற நிறுவனம், நவநாகரிக வடிவில் தமிழ் எழுத்துக்கள், திருவள்ளுவர், ஜல்லிக்கட்டு, கரகாட்டாம், கதைக்களி, கோவில் கோபுரங்கள் என தமிழ் மொழி சார்ந்த அடையாளங்கள் பதியப்பட்ட தீ-சட்டைகளை விற்பனை செய்து வருகின்றனர். இது இளைஞர்கள் மத்தியில் பெரும் வரவேற்பை பெற்றுத் தந்திருக்கின்றது.

தமிழானது இன்று வணிக மொழியாக இருப்பதை பல சந்தர்பங்கள் நங்கு நிரூபிக்கின்றன. அகமதாப்பாத்தின் ஓட்டல் ஒன்றில் தங்கியிருந்த போது, தொலைக்காட்சி அலைவரிசையில் ஆங்கிலம், இந்தியோடு தமிழ், தெலுங்கு, வங்காள மொழிகளில் கூட ஏர்டெல் செட்டாப் பாக்சை இயக்கும் வசதி செய்யப்பட்டு இருந்தது ஆச்சர்யபடுத்தியது. ஏர்டெல் மட்டுமல்ல இந்தியாவின் பல நிறுவனங்கள் தமிழ் மொழியில் தம் சேவைகளையும், சாதனங்களையும் வழங்கி வருகின்றன.

அதே போல அயல்நாட்டு வணிகங்கள் இந்தியாவுக்குள் நுழைகின்ற போது, உள்நாட்டு சந்தையில் இடத்தைப் பிடிக்க தமிழ் மொழிக்கு முக்கியத்துவம் கொடுக்கின்றார்கள். சாம்சங் செல்பேசியில் தமிழில் இயக்கவும், தமிழில் எழுதவும் கூட உள்ளீடு செய்யப்பட்டுள்ளதாம்.  அது மட்டுமல்ல சாம்சங் நிறுவனம் புதிதாக அறிமுகம் செய்துள்ள மைக்ரோவேன் ஒவன், வாஷிங் மெஷின்களில் கூட தமிழில் இயக்கும் வசதிகள் செய்யப்பட்டுள்ளனவாம். சமூக வலைதளங்களான கூகிள், முகநூல் போன்றவைகள் ஏற்கனவே தமிழில் தமது சேவைகளை வழங்கி வருகின்றன. இந்நிலையில் பிரபலமான ட்விட்டரும் தமது சேவையை தமிழில் வழங்கத் தொடங்கியுள்ளது.  

ஆங்கிலம் கலந்து தமிழில் விளம்பரங்கள் மூலமாக, சில சமயம் இந்தி கலந்தும் மக்களை ஈர்க்கலாம் என பல இந்திய விளம்பர நிறுவனங்கள் முனைகின்ற இவ்வேளையில், அமெரிக்க நிறுவனமான  Godaddy என்ற இணையதள சேவை நிறுவனம், நல்ல தமிழில் விளம்பரம் ஒன்றை வெளியிட்டு வெகுவாக பலரை கவர்ந்துள்ளது. உள்ளூர் சந்தைகளில் கால் பதிக்க உள்ளூர் மொழிகளில் விளம்பரங்களைத் தருவதன் முக்கியத்துவத்தை பன்னாட்டு நிறுவனங்கள் நன்கு புரிந்துள்ளன. முக்கியமாக சிறுவணிகர்கள் இணையதள முகவரி வைத்திருப்பதன் தேவையை விளக்கும் Godaddy நிறுவனத்தின் விளம்பரம் பலரால் பாராட்டப்பட்டு வருகின்றது.

தமிழுக்கான மவுசை புரிந்து கொண்டு அயல்நாட்டு வணிக நிறுவனங்கள் களத்தில் இறங்குகின்ற அதே சமயம், நம் நாட்டு அரசு தமிழ் மொழிக்கான இடத்தை இன்னமும் தராமல் இழுத்தடிக்குது என்றே சொல்லலாம். இந்தியாவில் இந்தி மட்டுமே இந்திய அரசின் செல்லப் பிள்ளையாக பார்க்கப்படும் சூழலில் தமிழ் உட்பட பல்வேறு தேசிய மொழிகள் மாற்றான் வீட்டு பிள்ளைகள் என்ற மனோபாவத்தில் அணுகப்படுகின்றன. தமிழ் மொழியின் தாயகமான தமிழ்நாட்டில் தமிழுக்கு இடம் இல்லையென்றால் உலகில் வேறு எங்கு போய் தமிழ் வளர்க்க போகின்றோம் சொல்லுங்கள்.

- மின் வாசகம்